In die dae van Mnr Herholdt was vervoer skooltoe slegs met perde, fietse, of donkie- en perdekarre. In die skadu van die ou wildevyboom reg voor die skool oorkant die straat, wat vandag nog daar staan, reg voor die saal en links langs die skool, het die “goevermentsdonkies” deur die dag gerus en geduldig gestaan en wag, terwyl die kinders geleer het, om hulle smiddae weer huistoe te neem.

In 1944, net voor die Tweede Wêreldoorlog beëindig is tree Mnr Heroldt uit en Mnr Le Grange volg hom op as skoolhoof. Soos die skool se behoeftes gegroei het, is nog grond bygevoeg van die staatsgrond wat vroeër vir onderwys geoormerk is, en in 1940, 1955, 1958 en 1967 is daar grond tot die skoolterrein bygevoeg. ‘n Personeelkamer, kunskamer en biblioteek is later aangebou, en op 7 Desember word die hoeksteen van die saal deur Mnr La Grange onthul. Die saal het die ou sinksaal wat deur die ouers self opgerig is, vervang.

Aan die einde van 1963 tree Mnr Le Grange uit en ‘n nuwe hoof moes aangestel word. In 1964 is Mnr Erasmus aangestel tot 1974 en in hierdie tyd is nog ‘n stuk grond aan die skool geskenk waarop die huidige pawiljoen, rugbyveld en atletiekbaan gebou is, nadat ‘n bedrag van R30 000 vir die doel ingesamel is. ‘n Pragtige swembad wat reeds in 1941 deur die inspekteurs in vooruitsig gestel is, word toe ook gebou, terwyl tennisbane ook tot die leerlinge se beskikking gestel is.

Drie ander laerskole het van Laerskool Rustenburg afgestig, naamlik Noordskool, Laerskool David Brink en Fields Primary. Laerskool Rustenburg word dan terreg as die moederskool van Rustenburg beskou. Oor die jare heen het die skool verskeie mense opgelewer wat groot hoogtes bereik het. Van die kinders wat later uitgestyg het, was daar belangrike leiers op verskeie terreine van die samelewing en vandag is die skool nog steeds ‘n sentrum van uitnemendheid waar kinders onderrig ontvang ter voorbereiding vir hul toekoms.